PHUHLAM LE HRANCHAW PHAWTNAK KONG

Hlan kan Laimi kan pipu hna nih khua khat le khua khat an rak i do tik le an rak i thah tikah remnak an tuah lo ahcun phuhlamnak an rak tuah tawn.  An teimi hna khua le an thahmi hna phun nih, an phu an hlam hna i remnak ant uah hlan tiang, khua khat le khua khat, hrinkhat le hrinkhat ngol loin an rak i do tawn an rak i that tawn.  Cu bantuk phuhlam cu atu chan tiang zongah thlanglei kan Lai tlang ram chung Mindat le Kanpetlet peng chungah a um ttheo tawn.  Cun khua khat le khat khat an rak i do tikah an teimi hna khunachung i a ummi chawva le an sattial le an ngeihchiahmi thilri vialte cu an lak hna i hranchaw a si caah ral a teitu hna nih i zat cio in an rak i phaw tawn.  An lakah upa bik a simi le hruaitu hna nih hranchaw cu tambik an co tawn.  Hranchaw phawt tik zongah phun dang le phun dang hrin dang le hrin dang khua dangmi le khua dangmi innpil chim le khuakhen thah i a kalmi hna cu tlawm deuh co le tam deuh cotin ruangah anmah le anmah zong an rak i that an i nawng tawn ti a si.  Cun hranchaw tlawm deuh co ruangah khua dang ral le hrin dang ral zong an i rawih tawn hna an rak ti.

Hlan kan pipu hna nih hi phuhlam phung le hranchaw phawt phung an rak ngeih zong hi hlan Israel miphun i an rak zlhmi phung le lam hi rak cawng hna sehlaw a dawh ko.  Kan Lairam ah phak hnu lawng in hi phung hi an rak ngeih ahcun khuazei khua in khuazei phun nih dah an rak tuah hmasa an rak ser hmasa ti kha hngalh a um lo.  Baibal cauk hlun chung i a ummi Israel miphun phung hi an cawn lai kan ti zongah kan Lairam ah Pathianbiaknak phung a phak hlanpi i an rak hngalh cangmi phung a si caah hlan Israel miphun hna i an zulhmi phunglam cu philhthlau loin nichuah lei ram chung an phak tiang rak i cinken hna sehlaw a dawh ko.  Cucaah cun Laimi phun hi kan hramthawknak ah cun Israel miphun rak si in a donglei ah cun hrin kip cawh si in atu Lai miphun ah cang hna sehlaw a dawh ko (Nambar31:1-54).

By Pu Ngun To