NUPICHUN NGEIHNAK KONG

                Hlan kan Laimi kan pipu hna cu nupitak le nupichun an rak ngei. Nupitak cu anmah tluk i a thiangmi an rak tthit hna.  Nupichun cu anmah nakin a niam deuhmi an rak tthit hna.  Nupitak cu ar an hmanh hna i kan Laiphung sunparnak vialte an tuahpi hna.  Bawite an bawipi hna, khuang an cawipi hna i tlangbawi nih thla an campiak hna.  Nipichun cu ar an hmanh hna lo.  Sunparnak an tuahpi hna lo.  Nutak hrin nih an pale ro an so.  Nuchun hrin nih ro an co kho lo.  Nutak hrin an um lo ahcun an unau nutak hrin nih an ro an co hna.

                Nupichun an tam deuh ahcun innpi nuchun le innlak nuchun in phun hnih in an um.  Innpi nuchun cu nupitak tangah an um i, lungthu tappi tlaitu an si.  Innlak nupichun cu inndang te ah an um.  Nupichun hna cu nupitak nakin muittha deuh an si ahcun an vale cu nupichun sinah an sor a tlu deuh ti a si i, nupitak nih a rem hna lo i inndang ah an um ti a si.  Cu lengah nupichun zong nih cun nupitak kuttang um cu an duh ve lo ti a si. ("sor a tlu" ti a sullam cu tam deuh ihpi tinak a si.)

                Nupitak le nupichun tthit an rak hngalhnak kong zong hi kan ruah tikah Abram nih nupitak ah Sara a ngei nain fa an hrin lo caah an salnu Hagar cu nupichun ah a rak ser caah kan Laimi kan pipu hna zong nih Abram nunning cu rak cawng hna seh law a dawh.  Cun nupitak Sara nih nupichun Hagar cu a rem lo caah a rak tliknak zong hi rak cawng hna seh law a dawh caah innlak nupichun in an rak um zong hi si dawh a si fawn.  Cucaah cun hlan kan pipu hna cu hlan lio Israel miphun an zulhmi phunglam cu philhthlau loin an zulh caah Israel miphun hrinthlak si nih a dawh ko hna. (Gen. 16:1-6: 15-16)

By Pu Ngun To