Thlanpi Ngeihnak Kong

Thlanpi Ngeihnak Kong

            Hlan kan pipu hna cu thlanpi ah an rak i vui/  Thlanpi cu thuk piin an cawh hnuah a sirlei ah an hei khuarh ttthan.  Cu a sir i an khuarhmi chungah cun, an ruak cu an chiah hna i, vawlei chilh a si a hnuah anmah chung an thih tikah cu thlan cu an hlai i cuka ah cun i vui lengmang a rak si.  Cun a cheu nih cun an thlan cu an tual lawng chaklei kam ah vawlei an khuah i cu thlan chungah cun an ruak an chiah i Lungpher kau piin an thlan cu an khar.  Ruak rim lengah nam hlah seh, tiah thlak in an phih dih.  A hnuah anmah chung an thih tikah thlankhar cu an hun i cu thlan chungah cun an ruak cu an chiah hna.  Cuticun anmah chung vialte cu an thih tikah ka dang hmun dang ah vui loin anmah le an pipu thlan ah cun rak i vui a si.

            Hlan kan pipu hna nih thlanpi an rak sernak kong hi kan ruah tikah ABRAHAM nih a nupi SARAH vuinak ah thlanhmun a cawk i a nupi cu MAKPELAH lo KUNGKUA ah a rak vui.  Cu MAKPELAH LUNGKUA ah cun, Ahraham le a nupi Sarah le Isac le a nupi Rebecah le Jacob le a nupi hmasa Leah cu an rak i vui.  (Gen 23) Hlan kan pipu hna zong nih hin khat vialte cu thlanpi pakhat chungah an rak i vui.  (Gen 23) Zeicaah Abraham  nuncan hi rak cawng hna seh law a dawh.

            Laimi phun nih Pathian an biak hlanah sarthi cu innchungah an rak suang hna lo.  Innchung ah Pathian an biaknak ;Khothlaban' an bah caah khothlaban tangah sarthi luhpi phung a si lo i, sarthi ruak cu innleng ah an rak suan hna.  Cun sarthi cu thlanpi asiloah innhmun chungah vui phung a si lo.  Hauleng ah an rak vui hna i cu thlan hmun cu 'sar thlan' an ti.  Hi phung an rak ngeihnak zong hi kan ruah tikah JACOB nupi pahnihnak Rachel nih a fapa Benjamin a hrinnak in a thi i sarthi a si caah an pipu thlankhor ah vui loin Bethlehem lei kalnak  lamkam thing tangah an rak vui.  Cu bantukin Laimi kan pipu hna nih sarthi cu hauleng ah an rak vui hna i thlanhmun cu an ti.  Cucaah cun kan Laimi kan pipu hna nih Israel miphun phunglam hi rak cawng hna seh law a dawh (Gen. 19) cun thlan lungphun kan ngeihmi zong hi Jocob nih a nupi Rachel thlan ah lung a rak phunnak hi rak cawng hna seh law a dawh.  (Gen 35:20).  Cun Laimi a cheu cu ramdang le lam hlapi i an thih tikah an vui hna i an titsa a tlol hnuah an thlan cu an hlai i an ruh cu an khua ah an tlunpi hna i an pipu thlan ah an vui tthan hna.  Cun bawihrin phung cu an ruak zong saupi suan a rak si.  Hi phung zong hi Jacob nih a thih hlan ah a fale ro a vuihnak hna kong hi hlan kan pipu hna nih philh loin rak i cinken hna in rak zul hna seh law a dawh.  (Gen. 39:29-33; Gen. 50:24-26)